Dr zwöitletscht Match vo dere Vorrundi ish vor dr Tür gstande. Das gege es Regio Volleyteam, wo mer zerscht mau hei müesse ga google, vo wo üse hütig Gegner chunnt. Nach echli Recherche ish usecho, dass üse Gegner hüt en Aareis us Huttwil macht.

Mit all dene Infos simer scho am Viertel vor Nüni ir Halle gstande (fasch alli, geu Lars :)). Spielsamschtigstand ufstelle ish dr erscht Programmpunkt gsi. Aaschliessend hei mir üs umzoge und si id Halle. Da mer aber scho ziemlech früeh si ir Halle gstande, hei mir üs no zwöi verschiedene Challenges gstellt. Nach üsne Versüech blind zserviere und Abnahme ine Ballchorb zsetze hei mir üse Fokus ufe Match gleit. (Videos zu de Challenges folge ufem Instagramkanal vom VBC)

Dr Gegner unbekannt und mir topmotiviert, simer in de Match inni gstartet. Mir hei dr Aafang liecht verschlafe und Regio ish echli drvozoge. Mir hei üs uf üses Spiel besinnt und si starch zrugg cho und hei dr erscht Satz gwunne.

Zwöite Satz u zum zwöite Mau hei mir es chliises Töif. Wiederum kämpfe mer üs retour und nehme oo de Satz mit. Zum dritte Satz gits eher weniger zsege. Mir hei nid nachegeh und dieses Mal vo Aafang aa Gas geh. Somit hei mir oo dr dritt Satz denn ziemlech klar chönne packe.

Es fehlt jetzt no ei Match ir Vorrundi und de hei mier am 16. uswärts in Köniz. Mir hoffe dass mir dVorrundi mit emne wiitere Vollerfolg chöi abschliesse.

ALOS!

Mit gueter Luune u motiviert si mir am Friti abe z Münsige acho u hei üs uf de Match gfröiit. Mit viu Elan si mir i erscht Satz gstartet u hei dert o lang chönne mithaute. Beidi Teams hei ihres beschte gäh u mir hei ä sehr usglichnige Start gha. Gäge Schluss hett leider d Konzentration chly gfäut u mir hei bizi z viu Eigefähler gmacht, so hei mir dr erst Satz müesse abgäh. Im zwöite heimer üs vo üs säuber z fest lah verunsichere, hei viu chliini Fähler gmacht u mir hei o de verlore. Im dritte Satz heimer nomau aues probiert, hei glich o viu kuuli Pünkt gmacht, aber füre Satzgwinn hetts leider o denn nid glängt.

Trotzerä 3:0 Niderlag chöi mir o stouz uf üs si. Mir hei zäme bis am Schluss kämpft, si immer no muetig blibe im Agriff u hei viu kuuli Pünkt dörfe fiire. Mir hei glich dr ganz Match e mega kuuli Stimmig gha u hei d Chöpf nid lah hange. U genau die Energie näme mir mit füre nächst Match u probieres denn möglechst vo Afang ah umzsetze. :)

D Stimmig ir Garderobe vorem Match isch grandios gsi, mit viu Vorfröid uf z Spiu hei mir zu gueter Musig scho mau chli Party gmacht.

Am Match säuber het die gueti Stimmig när chli Platz für ä gwüssi Müedigkeit müesse machä.

Der erscht, hert umkämpft Satz hei mir gwunne, da mir ir entscheidendä Phasä mit gnauä Ahnahmä u guetä Päss üsnä Ahgrifferinnä hei chönnä d Müglächkeit gäh mit klevere Fintä u prezisä Ahgriffä die entscheidendä Pünkt z machä. Nachem erstä Satzgwinn vor Saison föh mr dr zwöit Satz mit viu Eigäfähler ah. Dä Satz hei mr ungerangerem wägemnä Stimmigstöif müesse relativ dütläch abgäh. Früsch gstercht mit Schläckzüg hei mr im dritte Satz chönnä ar leischtig vo Satz eis ahchnüpfä. Mit däm vo langä Bauwächslä prägte Satz, hei mir üs dür üsi gueti Serviceleischtig chönnä dr erscht Punkt sichere. Im vierte Satz hei mir trotz genialä Rettigsaktionä dr eint oder angr lang Bauwächsu z viu verlorä. Fescht entschlossä startä mir mit mehrernä Servicseriä u rä Wahnsinnsstimmig so i füft Satz ds mr ds ganzä ganz kuhl hei chönnä fertigspilä u Langethal nüm ah üs mah härächo.

Mir hei z Spiel gäge VBC Langenthal mit 25:23, 13:25, 25:20, 20:25 und 15:11 gwunne🥳💪🏼

Es isch es astrengends und närveufribends Spiel gsi mit länge Ballwechsle, wo aber o sehr Spass het gmacht.

Üsi erste Pünkt i dere Saison!! Mir plane, no es paar meh z hole :).

ALOS!

Für die Saison isch viel veränderet und apasst worde a üsem Team. Mir hei ganz vo vorne agfange und hei alli Grundlage vom Spiel nomal neu glernt. Somit hei mir chöne identifiziere wer weli Stärchine het und wie die ids Spiel passe werde. Üses Ziel fürd Saison wäris im neutrale mittelfeld vor Tabelle z blibe und natürlech qualitativs Volleyball z spiele. Im Gägesatz zu de meiste Mannschafte spiele mir mit zwei Passeuse imne 6-2 System. Es isch e sältnerig bruchts System, wo bi üs die meiste no nie konsequent oder gar nie gspielt hei. Es isch e grossi Useforderig gsi üs dem System und Spielstil azpasse, aber es het zur Stärchi undem Geist vo üsem Team passt. Mir freue üs au dieses Jahr wieder zum spass am Spiel z ha und zäme Erfahrige zmache dörfe.