Mit nöier Unterstützig i üsem Trainer-Staff, viunä nöiä Spielerinnä, aber natürlich o mit paar autä Hasä, si mir vou motiviert id Saisonvorbereitig gstartet. Gli het sich usägsteut, dass z Niveau vo dä Spielerinnä sehr ungerschiedlich isch. Vor dä Summerferiä hei mir auso houptsächlich ar eigete Technik gfielet. Nach dä grossä Feriä si mir de uf z grossä Fäld u hei glehrt, üs dert z rächt z findä. Scho gli isch es Vorbereitigsturnier in Köniz vor dr Tür gstandä, wo mir üs zerst mau mit andernä hei chönnä mässä. Gstartet si mir dert ganz guet, hei aber o gmerkt, dass mir no chli öpis z tüe hei… Mir si aber zueversichtlich, gspannt u vouer Vorfröid uf di nöii Saison u wärdä o witerhin a üs schaffä. Auso los geits – uno, due, tre, VIA!