Miteme starch reduzierte Kader (a dere Stell ganz gueti Besserig a alli Betroffene) hei mir am Sunnti Nami VFM i Empfang gnoh. Trotzdem si mir voller Vorfreud gsie u umso meh bereit, fürenander z kämpfe.

Mir si guet i d Partie gestartet, hei üsi Gegnerinne lang im Griff gha. si selbstsicher uf dem Feld gstande u hei e super Stimmig gha. Doch gege Endi vom Satz hei sich paar Fehler iischliche u VFM het sich de Satz no chöne ergattere.

Im Zwöite Satz si mir ou usgliche gstartet, hei nähr aber Mühi gha dr Punkt z mache u d Gegnerinne hei das usgnützt u Punkt für Punkt chäne Vorsprung ufboue. Mir hei zwar nähr wieder zrug is Spiel gfunde, leider dr Rückstand aber nüme chöne guet mache u ou de Satz müesse abgäh.

Im dritte Satz isch klar gsie, dass mir no e Schippe müesse druflege, damits für üs no Pünkt git. Mit präzisere Aktione u starche Service hei mir üsi Gegnerinne chöne unter Druck setze u selber wieder meh Pünkt gmacht. Dank dem hei mir de Satz chöne für üs entscheide u es isch ine ersti Verlängerig gange.

Im vierte Satz hei mir leider chli e harzige Start gha. Üse Service Druck isch weniger höch gsie, drfür hei d Gegnerinne dert no e Zagge drufgleit. Das het üse Spielufbou erschwärt u mir si schnell i Rückstand gsie. Mitere guete Zämearbeit, viel Biss undere guete Stimmig vo dr Bank u de Zueschouer hei mir üs zwar nähr nomal chöne herekämpfe, es het aber am Schluss leider ni glängt e Punkt us dem Spiel mit znäh.
So bliebt üs nüt anders übrig als üs fürd Unterstützig vo allne Fans z bedanke u uf üses nächste Heimspiel, wo scho am Donnsti 20.02. stattfindet vorzbereite.

Sehr motiviert u gstercht vom Cupsieg am Friti simer ah üses erste Meisterschafts Heimspiu heregange. Leider hei mir die Motivation grad nid i erst Satz bracht u dr Start isch chli harzig gsi.

Im zwöite Satz hei mirs aber de kehrt u hei de klar für üs entschide.

Im 3. Satz heimer ir Mitti es chlises Loch gha u Grenche het üs churz abghänkt. Nacheme guete Comeback ändi Satz heimer ne de leider glich no abgäh.

Im 4. Satz hei mir de nomau aues inegworfe u hei üs mit Präzision u guete Service chönne düresetze. Nachdem üse erst Punkt vor Saison gsicheret isch gsi heimer aber ganz klar no e zwöite wöue.

Mir si zwar sehr guet i 5. Satz gstartet, hei aber ändi Satz üses Spiu leider nid chönne dürezieh u verlore. Fazit: üse 1. Punkt vor Saison isch ir Täsche aber mir si logisch nid ganz z’fride u wei meh. Darum heissts ize nomau guet trainiere u ner am Donnsti Abe ir Schadau scho z nächst mau Hopp Thun.

Ganz ungwohnt hei mir üsä nächst Cupmatch amene Fritiabe bis üs deheime gha. Mir si vo Afang ah sehr motiviert gsi, üses beste Volleybau z zeige u üs so i di nächsti Rundi z'spiele. Mir hei üse Gegner vom erste Punkt ah mit starche Service u wuchtige Agriffe unger Druck gsetzt. D Stimmig isch sowohl uf aus o näbem Fäud super gsi. Mir hei enand agfüüred u üsi Pünkt gfiired. Spetistens im zwöite Satz, wo mir zu 10 gwunne hei, heimer z'Gfüu gha, dass mir da als sicheri Siegerinne vom Fäud chöi gah. U dür das het bi üs grad dr Fade chli möge risse. Mit nümme so viu Überzügig i üsne Aktione u viu Eigefähler hei mir de Satz müesse üsne Gegnerinne überlah. Mitem Wüsse, dass mir üsne Gegnerinne eigentlich überlägä si, hei mir üsi Leistig vode erste zwöi Sätz im vierte Satz nomau wöue zeige. I dem Satz isches no einisch schneu gange, wöu mir s Spiu wieder diktiert u üsi Gegnerinne somit unger Druck gsetzt hei. Iz si mir gspannt, uf wen mir ir 4. Rundi vom Cup träffe, aber bis denn steit no s einte oder angere Meisterschaftsspiu ah.

Üses erste Spiel vor Saison hei mir uswärts gäge Münsige gha. Am Vieri hets agfange und recht gli scho wieder ufghört, leider mit 3:0 füre Gägner. Zfride si mir nid so und obwohls es paar cooli Pünkt het gä isch üses Spiel vo Eigefähler gspickt gsi. Üs isch ufzeigt worde, a was mir no müesse schaffe und mir si froh, isch der erst Match itz düre und d Saison eröffnet. 

Es cha nume no besser wärde😉.

Nach ere chliine Verschnuufpouse nach dr letzte Saison u mit Versterchig vo zwöi junge Spielerinne uf dr Position Libera u Mitti si mir mit konzentrierte Technik- u schweisstribende Athletiktrainings id Vorbereitig gstartet. Mir hei üs vorauem im technische Beriich jedi einzeln nomau wöue verbessere, aber natürlich heimer oh ah üsem Zämespiu nomau gfielet. Oh im Beriich Athlethik hei mer nomau vougas gäh.

Ändi Ougust hei mer no vomne Trainingsweekend chönne profitiere. Bi all däm isch natürlech di einti oder angeri Schweissperle gflosse. Aber mir hei üs mit gueter Luune u luter Musig motiviert u si am Ändi mit emne Lache us dr Haue gloffe (ämu meistens). Ändi September hei mer de no es Trainingsspiu geg d NLB vo Oberdiessbach gspiut u hei da natürlich vom guete Niveau vom üsne Gäscht sehr chönne profitiere. Mir hei üs sehr guet gschlage, hei aber oh ufzeigt becho, a was mir no müesse schaffe im Ändspurt vo üsere Vorbereitig. Letzti Saison hei mer üs aus Ufstiger dr Ligaerhaut chönne sichere, das Jahr weimer aber meh. Üses Ziu isch, üs witer ir 1. Liga z etabliere. Mir sträbe e Rang im vordere Mittufäud ah. Was d Vorfröid aageit: Mir chöis aui chuum erwarte. Darum isch d Motivation definitiv 11 vo 10. Am 13.10. starte mir gäge Münsige i di langersehnti Saison 24/25 u am 27.10. isch de o scho üses erste Heimspiu gäge Grenchen.

Fründe, mir gseh üs ir Schadau u i däm Sinn AUSO!