Hinten (v.l.n.r.): Janine (Trainer), Sophia, Jamina, Lina, Laura, Frederieke, Debora, Julia, Marina (Trainer)
Vorne (v.l.n.r.): Trix, Elena, Giulia, Lin, Noemi B., Tanja
Es fehlen: Natasa, Eliška, Lara, Noemi J.
Team
| Bader | Noemi | Dia |
| Baumann | Jamina | Mitte |
| Beyeler | Elena | Pass |
| Bütler | Julia | Aussen |
| Ceznerová | Eliška | Pass |
| Giese | Lina | Mitte |
| Heininger | Friederike | Aussen |
| Huber | Sophia | Aussen |
| Imhof | Laura | Dia |
| Jost | Noemi | Aussen |
| Markovic | Natasa | Dia |
| Meier | Lin | Libera |
| Recher | Debora | Mitte |
| Regez | Tanja | Pass |
| Spycher | Beatrice | Pass |
| Tommasi | Lara | Mitte |
| Waldburger | Giulia | Libera |
Trainingszeiten
| Montag | 20:00 - 21:45 Uhr |
| Donnerstag | 20:00 - 21:45 Uhr |
Trainerin
Moser Janine
Berichte Saison 2026/2027
Vbc Thun 2:3 Vbc Konolfingen vom 02.11.2026
Hüt hei mir üs gäge Konolfinge mit 2:3 müesse gschlage gä.
Im erschte Satz hei mir zersch chli Zit brucht, bis mir is Spiel gfunde hei. Wo mir das när aber gschafft hei, hei mir ufdreit u alles gä. Dä Satz hei mir de o für üs chönne entscheide.
Im zwöite Satz isch es bi üs nid so glofe. Mir si i es Loch gheit u hei nume sehr schwer wieder usegfunde. När hei mir dä Satz leider verlore.
Im dritte Satz hei mir nomau alles gä u zeigt, was mir chöi. Dä hei mir klar für üs chönne entscheide.
Im vierte Satz hei mir am Afang wieder chli Schwierigkeite gha. Mir hei aber bis am Schluss dürezoge u nid ufgäh. Trotzdem hets leider nid glängt u mir hei o dä Satz verlore.
Dr letscht Satz het o nid optimal gstartet u mir si zimlech hinde gläge. Doch mir hei d Närve nid verlore u bis zum Schluss kämpft. Mir hei no guet chönne ufhole, aber leider hets nid glängt u mir hei üs mit 2:3 müesse gschlage gä.
Für dr nächscht Match näme mir mit, dass mir trotz Schwierigkeite sehr guet kämpft hei. O wenn nid immer alles funktioniert het, hei mir nid ufgäh u bis zum Schluss alles gä. Fokus!
Köniz vs. VBC Thun 3. Liga vom 31.10.2026
Hüt hei mir üs gäge Köniz mit 0:3 müesse gschlage gä. Sowohl im erschte wie o im zwöite Satz hei mir chli Zit brucht, um is Spiu z finde. Dadurch si mir punktemässig zwüschezitläch dütläch hingerdri gsi, hei üs aber beidi Mau wieder chli chönne zrügkämpfe. Trotzdem hets am Schluss nid ganz glängt, um d Sätz no für üs z entscheide.
Im dritte Satz hei mir de no mau richtig ufdräit! Üsi Annahme si besser worde und mir hei no es paar richtig schöni Pünkt chönne mache. Das het zeigt, was eigentlich i üs steckt!
Was mir im Training zum Zuspiel dür nid d Passeuse glehrt hei, hei mir hüt direkt im Match chönne umsetze!💪🏼
Aber mir löh nid der Chopf la hange! Mir häbe zäme, kämpfe zäme u wachse zäme. Jede Match bringt üs wiiter u mir hei no lang nid gnueg! Ize nähme mir de Schwung us em dritte Satz mit, schaffe wiiter a üsne Schwäche u zeige im nächste Spiel am Mäntig, was i üs steckt! ❤️🏐 Fokus!
Cupspiel vom 26.10.2026
Vbc Thun 3:0 Uni BernNachdäm mir am Samsti üses Meisterschaftsspiel gägä VBC Uni Bern hei gwunnä, hei mir 2 Täg später üses Cup-Spiel gägä di gliichi Mamnschaft gha. Obwohl mir scho chli hei gwüsst, was uf üs zue chunnt, hei mir - einisch meh - chli Startschwierigkeitä gha. Aber mit viu Iisatz, gueter Service- u Blockarbeit hei mir dr Rückstand chönnä ufholä u dr Satz gwinnä.
Im 2. Satz hei mir dr Schwung chönnä mitnä u o dä für üs entscheidä.
Im 3. Satz hei si mir de wieder ines Loch gheit u zimlich i Rückstand gratä. Aber o da hei mir üs wieder chönnä usäkämpfä u dr Match 3:0 gwinnä.
Mir nämä mit, dass mir üs o usemnä Töif chöi usäkämpfä. Das stimmt üs doch positiv fürä witer Verlouf vor Saison u für di nächsti Cup-Rundi.
Match vom 24.10.26
Vbc Thun 3:0 Uni BernHüt isch üse zwöit Match vor Saison gäge Uni Bärn ahgstande. Trotz dr (für üs eher) früche Ahspiuziit isch d Stimmig bi üs abm erschte Punkt super gsii. Mir si guet ids Spiu ihnecho, aber oh vo üsne Gägnerinne isch viu zrügg cho. Bis mitti Satz ischs rächt usgliche gsi u när hei mir üs chöne absetze u mit guete Abwehraktione, guete Pass u clever Angriffe u Finte dä Sätz für üs chöne gwinne. Voraum ir Defense und was z‘ Verantwortigsübernäh ahgeit hei mir üs zu letscht Samsti extrem gsteigeret u hei viu sicherer gspiut, was hüt ä wesentlech Unterschied zu üsm letschte Spiu het gmacht. Oh dr zwöit Satz heimer üses Spiu chöne wiiterziehe u rächt klar gwunne. Im dritte Satz ischs gäge Schluss no mau chli knapper worde, aber mir si ruhig bleibe u hei dä Match 3:0 für üs chöne entscheide. Fokus!
Match vom 17.10.26
Vbc Grosshöchstette 3:0 Vbc ThunMit eme Grossufgebot a Spielerinne simer uf Grosshöchstette grösslet.
Ds Zitmanagement vorem Match hett no chli Optimierigspotenzial, üses Spiel leider oh. Mir vrliere nach 3 Sätz klar gäge d Grosshöchstetterinne. Im erschte Satz hautemr lang mit u chöme aber nid so rächt dri. Im zwöite Satz füehre mir am Afang klar, müesse die Füehrig aber de gli widr abgeh. Im dritte Satz startemr guet, ds Serviceziel vor Marina würkt u mir chöi so chli Druck mache u chöme ine gueti Phase. Dür wenig Vrantwortigsgfüehl ufem Feld und viune Eigefähler müesse mir üs gschlage gä. Ihri Defense isch dürds Band wäg sehr guet gsi, üsi definitiv weniger. Mir wüsse wasmr ide nächste Trainin ztüe hei u fröie üs aber ab dä guete Momänte u däm wo guet glofe isch. Fokus!
Uni-Turnier, 13.09.26
Gstartet si mir am Sunnti-Morgä mit viu Energie u Elan u hei dr erst Match gägä z Heim-Team 2:0 für üs chönnä entscheidä. Mir hei sitem VBC-Turnier doch es paar Verbesserigä chönnä gseh. U si zueversichtlich gsi fürä witer Verlouf vom Turnier.
När hei mir ä längi Pousä gha, wo ufgrund vo Verspätige de no länger isch wordä; das het üs definitiv nid gholfä. Im 2. Match hei mir so üsi Problem gha; vilicht simer o ufgrund vo grad zwöi ungwohntä Positions-Bsetzigä augemein chli verunsicheret gsi. Dr erst Satz hei mir verlorä, dr 2. de aber doch no gwunnä.
Dr 3. Match hei mir gägä z 4. Liga-Team vo Thun gspiut. Einisch meh hei mir müessä merkä, dass mir lieber d Rouä vom «Underdog» hei; mir hei vo Afang a Müeh gha u dr Bau eifach nid z Bodä bracht u somit dr erst Satz verlorä. Mit viu Kampfbereitschaft hei mir de dr 2. Satz aber doch no chönnä gwinnä.
Mir si drvo usgangä, dass mir ufgrund vo de dänä 2 Satzverlustä sicher nid Gruppä-Ersti si, aber irgendwie hets de schiinbar glich glängt. U so simer de tatsächlich im Final umä 1. Platz gstandä. Üsä Gägner (Erstplatziert vor anderä Gruppä), het mit starchä Service u hertä Agriffä zeigt was si chöi u so hei mir üs im erstä Satz müessä gschlagä gä. Mir hei aber trotzdäm es guets Gfüehl mit i 2. Satz gno, wüu mir für jedä Bau u fürenang si gangä u ä gueti Sitmmig ufem Fäld hei gha. Dr 2. Satz hei mir de gwunnä u hei üs so no ä Entscheidigssatz erkämpft. U o dä hei mir erfröilicherwiis no chönnä gwinnä u hei somit dr wohlverdient u altbekannt Schoggichuechä gwunnä 😊.
Das Turnier isch chli es uf und ab gsi. Aber unterem Strich zieh mir es positivs Fazit. Es isch i dä letschtä Wuchä einiges gangä u mir si zueversichtlich, dass mir a üsnä Schwachsteuä no chöi dran schaffä u besser wärdä. U so fröiä mir üs uf di bevorstehendi Saison u sägä «FOKUS».
Berichte Saison 2025/2026
Matchbericht vom 22.03.2026
LigameisterturnierLigameisterinnen
Matchbericht vom 07.03.2026
VBC Thun - Volley Liebefeld 3:0 (25:9/ 25:20/ 25:13)Mit em klare Ziel sind mir i s Spiel gange: üsere Vorsprung i de Tabelle bestätige. Und de Plan isch fasch verdächtig guet ufggange. Satz für Satz hend mir d’Gegnerinne mit guetem Service, stabiler Verteidigung und Angriff, wo meistens genau det glandet sind wo sie sötted, uf em Bode uf ihrer Spielfeldhälfti, unter Druck ghalte.
Es chliises Drama het sich s Spiel nume am Ändi vom zweite Satz gönnt, wo mir d’Gegnerinne churz no es bitzli hend la näher cho. Zum Glück hend mir üs rechtziitig wieder drann erinnert, dass mir eigentlich wänd gwünne, hend de Satz no hei gholt und de dritte denn relativ souverän fertig gspielt. Resultat: 3:0 für üs und d’Tabellespitze bleibt bi üs. 💪🏐
PS: Für d’Richtigkeit vo däm Übersetzig isch ChatGPT verantwortlich. Allfälligi Reklamatione bitte direkt a ihn richte 😄
Matchbericht vom 26.02.2026
VBC Bern - VBC Thun 1:3 (13:25/ 26:24/ 18:25/ 18:25)Mit ziemlich dezimiertem Kader si mir a dä Uswärts-Match uf Bärn greist. Nachdäm sich zwöi Spielerinnä wägä Chrankheit no churzfristig hei müessä abmäudä, si mir no 7 Lüt gsi (mit Libera); d.h. ke Möglichkeit zum uswächslä. Mir hei aber gwüsst, das üs mitemä Sieg dr Ufstieg sicher isch u si motiviert gsi, üsi Siegesserie witer z zieh.
Mit starchä Service, hei mir dr erst Satz zimlich chönnä dominierä. Drfür si mir im 2. Satz am Afang grad chli unger gangä. Mir hei gfüehlt aui Pünkt gmacht, aber leider nid numä üsi 🙈. Nacherä närväufribendä Ufholjagd, hei mir dr Satz leider trotzdäm knapp verlorä.
D Sätz 3 u 4 si zimlich ähnlich gloffä: bis uf paar einzelni schöni Pünkt isches chli ä Chrampf gsi u nüt schöns gsi zum zueluegä.
Trotz auem hei mir dr Sieg hei bracht u üs dr Ufstieg gsicheret! Hokus, Fokus 🍾
Matchbericht vom 12.02.2026
VBC Thun - VBC Uni Bern 3:0 (25:17/ 25:23/ 25:19)Hüt hei mir gäge ds zwöit platzierte Uni Bärn gspiut. Vo üsne Gägnerinne isch viu zrügg cho, sowohl starchi Ahgriffe wi oh Service. Mir hei Vougas müsse gäh i jedem Satz u hei nid dörfe nachelah. Ds hei mir bis zum Schluss relativ konstant chöne dürezieh und ä kuule Match mit 3:0 chöne gwinne.
Matchbericht vom 08.02.2026
VBC Münchenbuchsee - VBC Thun 1:3 (15:25/ 17:25/ 25:20/ 14:25)Wo mir i d Halle sy cho, hei mer nes gägesittig fasch nümme verstande. So lut isches gsy.
Dr 1.& 2. Satz hei mer klar gwunne. Im 3. hei mer starch nacheglah und dr Satz ufgrund vo Eigefähler abgäh.
Miteme wider bessere 4. Satz, hei mer de di 3 Pünkt doch no gholt.
Matchbericht vom 31.01.2026
VBC Thun - Volley Köniz a 3:0 (25:10/ 25:20/ 25:20)zMotto vom Match hüt: “Tief spielen, hoch gewinnen”. Die 3 Sätz zemegfasst vo Märcu: “Jede Afang verschlafe und gege Schluss immer besser gspielt”.
Da sege mir numme: Hokus Fokus :-)
Matchbericht vom 23.01.2026
VBC Lyss - VBC Thun 1:3 (17:25/ 25:16/ 10:25/ 21:25)Mir sy miteme rächt klar gwunnene erschte Satz i dä Match gstartet.
Bim 2. hei mer öppis aagfange jufle, u wo mer nes gfange hei gha, hets de doch nüm glängt.
Im 3. Satz hei mer nes de definitiv wider gfange u zu 10 gwunne.
Dr letscht Satz isch no mau rächt närveuftribend gsy. Aber mit emene 25:21 hei mer di 3 Pünkt chönne heibringe.
Matchbericht vom 17.01.2026
VBC Thun - VBC Studen 3:0 (25:18/ 25:22/ 25:18)Trotz limitierte Wächsumüglechkeite, da mir nur ds 7. gsi si, hei mir ä guete erschte Satz gspiut. Üsi Gägnerinne, mit dütlech meh Uswächsuspielerinne, hei immer wieder sehr gueti Phase gha u üs zwüschdri rächt gforderet. Mir hei jede Satz rächt konstant üses Spiu chöne spiele u oh nach äs paar Fähler no muetig ahgriffe u immer dr Punkt gsuecht. Mir hei aber gmerkt, ds nid vo alleini geit u mir aui vougas müsse gäh. Ds hei mir när oh gmacht u ds Spiu 3:0 für üs chöne entscheide.
Matchbericht vom 10.01.2026
VBC Thun - VBC Aeschi 3:0 (25:12/ 25:11/ 25:20 )VBC Aeschi hoch 2: nachem cup spiel vorgester heimer wieder dörfe gäge aeschi spile :-) dä match heimer mitere super service serie gstartet u ou süsch si die zwöi erste sätz klar uf üses konto gange. Im cup spiel am donnstig heimer aber dütlech besser gspiut gäge d 2. liga ;-) aber es het trotzdäm wieder für 3 pünkt glängt - üsi siegerserie geit witer. FOKUS!
Matchbericht vom 8.1.2026
VBC Thun - VBC Aeschi 2. Liga 0:3 (13:25/ 24:26/ 9:25)Am 08.01. heimer im cup spiel bi üs deheime gäge d 2. liga vbc aeschi gspiut. So wit simer no nie cho imene cup ;-) wier hei üs sehr uf das spiu gfröit - höchere ligagägner, 2 schiris, ä schriber u vieli zueschouer deheime. Trotz 3:0 niederlag isches es super spiu gsi wo het gfägt. Im 2. satz heimer sogar no fasch dr satz gwunne, dä isch 24:26 usgange. Übermorn träffe mr grad wieder ufe vbc aeschi i üsem nächschte meisterschaftsspiel, FOKUS!
Matchbericht vom 11.12.2025
VBC Thun - Volleyball Papiermühle a 3:1 (25:20/ 25:18/ 22:25/ 25:20)We secured a solid 3:1 victory, showing strong teamwork, good energy, and a clear will to win.
The third set, however, decided to test our nerves, especially from the service line. A few serves clearly preferred sightseeing over landing in the court 😄. Luckily, we survived our own serving adventure, refocused, and took control again.
Strong finish, good vibes, and another win in the pocket. On to the next match, with a little extra love for our serves
Matchbericht vom 1.12.2025
Volley Liebefeld - VBC Thun 0:3 (23:25/ 14:25/ 18:25)Im erste Satz heimer okey gspiut hei abr ou es paar eigefähler gmacht u hei nid üsi besti Site chönne zeige, deswege heimer de Satz numme knapp gwunne.
Ih zweuti Satz simer schlächt gstartet, hei abr nachem time out nomau neu ahgfange u ds mit erfoug. Mir hei sehr gueti verteidigunge u ahgriffe ka. Dank ehre lange Serviceserie heimer mitemene guete Vorsprung dr Satz chönne beände.
Im dritte Satz heimer üses Höch chönne mitneh u si sehr guet drane gsi, doch natürlich het sech ds no gänderet u so heimer ou de Satz numme knapp gwunne.
Matchbericht vom 27.11.2025
VBC Thun - VBC Bern 3:1 (25:17/ 19:25/ 25:18/ 25:23)Am Donnstiabe heimer gäge ds dritt platzierte VBC Bern gspiut. Im erschte Satz simer sehr guet gstartet u hei kuuli Pünkt chöne mache, ob mit Service oder im Ahgriff. Somit hei mir de erschti Satz rächt schnäu für üs chöne entscheide.
Mit chline Startschwierigkeite si mir i zwöit Satz gstartet, hei när aber wieder i üses Spiu gfunde. Vo üsne Gägnerin sie vieli blödi Bäu u Rettigsaktione no irgendwie übere cho. Mir si immer chli ds spät gsi am Block und di einti oder anderi Ahnahm isch chli ds nöch ads Netz, was üs wärtvoui Pünkt gchoschtet het. Schlussendlech hei mir i däm Satz eifach ds viu Eigefähler gmacht u hei de Satz üsne Gägnerinne müsse überlah.
Mitm Mindset „dä 2.Satz vrgässe mir grad wieder“ simer i dritt Satz gstartet u hei weniger Fähler gmacht und wieder ähnlech gspiut wi im 1. Satz u somit de Satz gwunne.
Im 4.Satz ischs nomau chli kritisch worde, üsi Gägnerinne hei nomau aues gäh u si ah jedem Bau no irgendwie dranne gsi. Mir si aber drannebliebe u hei de Satz schlussändlech gwunne.
Matchbericht vom 15.11.2025
VBC Uni Bern - VBC Thun 1:3 (16:25/ 25:23/ 21:25/ 17:25)Mir sy mit starcher Leischtig i dä Match gsartet und hei dr erscht Satz für üs entschide.
Im zwöit sy d Bäll irgendwo im "Guggehü" (Zitat Märcu) glandet. Mir sy nes einig, dass mer dä Satz gschider vergässe.
Mit viu Närve hei mer dr dritt Satz de wider gwunne und miteme wider chli bessere vierte Satz i däm Match doch no 3 Pünkt gholt.
Matchbericht vom 08.11.2025
VBC Thun - VBC Münchenbuchsee 3:0 (25:13/ 25:13/ 25:12)Nachdem mir überne Stund mit Iwärme hei verbracht, bis üsi Haue isch frei worde, heimer gfunde, mir hole de zytlech Rückstand wieder uf. Dementsprechend ischs oh ä churze Chut worde: Mit zwöi mau zu 12 und einisch zu 13 heimer es souveräns 3:0 useghout u das aues unger eire Stund - jede Satz isch nemlech genau 18 Minute gange. So hei mir üs nid nur di nächste 3 Pünkt u di witeri Tabellefüehrig gsicheret, sondern oh derfür gsorgt, dass es a dem Spiusamsti zu kene witere Verzögerige chunnt u di nächste Teams für ihre Match wieder pünktlech id Haue hei chönne. Fokus!
Matchbericht vom 01.11.2025
Volley Köniz a - VBC Thun 1:3 (14:25/ 18:25/ 25:18/ 14:25)1. Satz. Mir si super ids spiu ine cho und mit gueter absicherig vom Feld, es paar guete Blocks und gschide fintene heimer de Satz oh schnell für üs entschide gha
2. Satz. Am afang hets grad chli startschwirigkeite gäh aber womer üse Rhytmus wider gfunde hei, heimer oh mit dem Satz churze prozess gmacht
3. Satz. Mir si eigentlech uf glichem Level gsi wie d gägner aber mit eire guete Service „Streak“ vo de gägner hei si üs zimlech usenang bracht und ner ha ig als Trainer no e schlechti uswächslig gmacht und somit isch de Satz leider ad gägner gange.
4. Satz Hei d gägner sehr grossi problem gha am Afang und scho bi 4:1 für üs beidi Timeouts bruucht gha und so heimer se eifach zu Fähler chönne zwinge und hei so de 3:1 gwunne.
Fazit: Einisch meh überlege weme wächslet
Matchbericht vom 24.10.2025 (Cup)
VBC Sotto-Simme (5L) - VBC Thun 0:3 (11:25/ 8:25/ 11:25)Bim Cupspiel gäge d 5. LIga vom Sotto Simme, hei mir trotz improvisierte Positione es top Spiel chönne zeige. I aune drü Sätz hei mir mit meh aus 10 Pünkt Vorsprung gwunne. Di unvorhärsehbare Bäll hei mer i de meischte Fäll guet gha u o we d Häufti scho am Bode isch gläge, hei mer dr Ballwächsel no nid ufgäh.
Somit sy mir nach nume eim Spiel scho ir 3. Rundi vom Regionalcup und sy gspannt wis für üs witergeit.
Matchbericht vom 23.10.2025
VBC Thun b - VBC Lyss 3:0 (25:15/ 25:13/ 25:12)Dr Heimmätsch gege VBC Lyss heimer mitemne 3:0 (25:15, 25:13, 25:12) gwunne. Obwou ds Resultat dütlech usgseht, isch z Spiu phasewiis segemer mau spannender gsy.
Ih erscht Satz simer super gstartet u hei schneu chönne punkte. Mir hei viu Servicefehler u derum hei si glich no chly chönne ufhole.
Im zwöite Satz hei si uftreit, mir si churz unsicher worde u hei weg dem viu Eigefehler gmacht. So ab dr Mitti vom Satz heimer üs aber de wieder besser chönne konzentriere u de isches de schneu gange.
Dr dritt Satz simer vo Ahfang ah konzentrierter ahgange, was sech oh im Resultat zeigt. Aber oh hie heimerse wieder dür üsi eigete (vorauem Service) Fehler lah Pünkt mache.
Aues ih auem simer aber glich zfride mit üs u neme di 3 Pünkt gern mit :) Witer so!
Matchbericht vom 18.10.2025
VBC Studen - VBC Thun 0:3 (8:25/ 19:25/ 15:25)Wir kamen, sahen nichts und siegten trotzdem
Im erschte Satz si mir super gstartet, trotzdr ungüstige Kombination vom Stunnestand undr Fensterplatzierig i dere Halle. Stude hett Schwierigkeiten ir Annahm gha und mir aber oh sehr starchi, konstanti Service. Dr erscht Satz heimer zu 8 gwunne u hei uf die besseri Hallehälfti chönne wächsle.
Im zwöite Satz hei üsi Gägnerinne chli ufräit u üs meh gforderet. Vor auem im Block heimer es paar mau zviu e zu grossi Lücke gha oder ds Timing vrpasst. Dür ihres grosse Mittiloch und witerhin starche Service heimer aber oh dä Satz 19:25 für üs entschide.
Mit sehr gueter Luune, lutem Fäne vor Sitelinie heimer dr dritt Satz schneu hinter üs bracht. Nach 53 Minute insgesamter Spielzit simer fertig gsi. Mir fröie üs ufd Rückrundi gäge VBC Stude, mir hei uf jede Fau Spass gha a dä schnäue Bäu u dä spannende Ballwächsel.
Fokus!
Matchbericht vom 12.10.2025
VBC Aeschi - VBC Thun 1:3 (25:22/ 8:25/ 17:25/ 17:25)Satz 1
Maximali Kathastrophe, rede mer nid drüber, abhagge
Satz 2 und 3
Sehr e dütlechi Aglegeheit gsi für üs, oh wenn mer d Bäu oftmals nid z direkt z Bode hei bracht und mehreri Versüech hei brucht. D Serviceleistig isch aber top gsi.
Satz 4
Nomau wiud düre gwächslet heimr de oh gad e chli Tempo use gno, zum Glück heimer nis de aber wieder chönne fange und nid ine 5. Satz müesse.
Fazit: Verbesserigspotenziau riesig
Saison-Vorabbericht
Mir, d Dame 4. Liga b, starte früsch u munter i die neui Saison u dises Mau zwöi Lige töifer.
Nach es paar Wechsle im Team - neue Spielerinne, neue Trainer, neui Energie - si mir dranne üs neu z finde als Team.
Üses Ziel: Aui mitneh, zemewachse u üse eiget Flow finde. I dr Saisonvorbereitig hei mir bsunders dr Ahgriff ahgluegt - iz weimer mit schneue Bäu, Stägene u freche Finte für Action z sorge. Us de Turnier heimer mitgno, dass mer üses Spiu müesse spiele u üs nyd sötte usem Konzept la bringe vo unkonventionelle Bäu.
U so sött nyd all zu viu schief gah.
Iz heissts: Gas geh, Fokus bhaute u id 3. Liga ufstige
