Nach zwo abbrochene Saisons freue mir üs jetzt dopplet uf die bevorstehendi Meisterschaft. Mir spiele nach wie vor im A, dr sterchschte Gruppe vo de Dame ohni Lizenz. Als Vorbereitig hei mir üs uf z VBC Turnier gfröit, aber leider z’spät gmerkt, dass z’Amälde isch vergässe gange. Drum het me üs ir Halle de vorallem als treui Hälferinne atroffe. Üses Team isch e flotti Truppe Froue vo jünger bis älter, wo d Fröid am Volley teile. Mir hei e gsunde Ehrgiz u tüe gärn gwinne, aber dr Spass am Spiele darf nid z churz cho. Mutig wage mir üs diesi Saison a nes neus System, o wenn’s mängisch uf em Fäld no chli chaotisch zue und här geit. Mir freue üs ufene hoffentlich unfallfreii, gueti Saison mit vielne spannende Spiel.