Mir si aui zeme uf Bern greist mitem Zug, so heimer no meh chönne lafere. Mir hei üs ä henne schöne Tag usgseucht mit Sunneschin und blauem Himmu. Mir hei de Ihfüehrigskurs müesse mache (es bitzeli viu blablabla und vili Farbe) aber o de heimer bestande. (Logisch).

Ahgleit und gfröit wie chlini Chinder isches auso würk hoch hinaus und mir hei am Ahfang e eifachere Parcour absolviert. Der zwöit Parcour isch auso scho sehr streng gsy, vili gueti und motivierendi Wort wie oh Hiuf uf de Platforme hets brucht, aber natürlech hei mir das zeme henne guet gmeisteret. Stolz simmer vorallem dasmer aui ds Fultierhange hei überstande. Zum Abschluss heimers wöue gniesse und hei üs la hänge und nume d tirolien (tirlilione 😊) zum, freeesä ahghänkt und looosdüset. Natürlech heimer o d Ussicht immer wider gnosse, und glychzitig d Arme trainiert.

Nach däm Abendtür si es paari hei wege Preüfigsstress und lerne, der Rest hetsech Momos postet und isch zeme ih ds Marzili ga främsle.  

Nachemne glungnige Tag heimer ir GB no es Glässeli gno und si müed aber völlig zfride nachemne erlebte Ferietag wider hei.

Fazit vo dem Tag:

• Mitem richtige Team schaftme alles
• Mir si Überflüger ih aune Situatione
• Mir hei sterchine und schwechine vonanend kenne und liebeglehrt
• Es isch ih d Arme gange (villech chly meh trainiere?:))
• Es het ungloublech gfägt
• Ussicht gnossä
• Es isch für die chline schwirig gsy-> aber die grosse hei gholfe
• Mir sy cool und motiviert