Neui Saison, neui Versterchig, neui Positione, neui Trainer… u riese Vorfreud! So chönnt me üses Team für diä Saison beschribe. Üses 3. Liga a ish mit 5 junge Froue verstercht worde. Für di neue Trainer Dave u Pesche fürd Saiosonvorbereitig ä super Vorussetztig, da vili Optione für mehreri Positione i Frag chöme, aber sicher o e Useforderig, jedi vo üs optimal iizsetzte. I de Trainings wird Vieles testet und usprobiert, aui si voll motiviert derbi. D’ Stimmig im Team und der Iisatz stimme scho mau.

Das merke mer o im Trainingsweekend womer z Sumiswald im Sportforum verbracht hei. Me merkt, dass di neue Spilerinne scho super im Team integriert si und dr Humor vo letscht Jahr glichwohl isch erhalte blibe. Obwohl mer e super Ziit z Sumiswald verbringe, heimer jedoch beschlosse, dass üses Team gärn nächsts Jahr uufd Maledive iz Lager wet…(Sponsore dörfe sech sehr gärn melde) ;) Es paar vo üs überlege sech o Sportart z wächsle und mit Acrobatic Rock‘n‘Roll aazfah, wiu z Schwiizer Nati Team e Halle wiiter o Trainingsweekend het und üüs aui sehr beeidruckt. Es si aber ner glich aui bim Volleyball blibe (das Acrobatic Rock‘n‘Roll ish leid aasträngend!).

Nachem Trainingslager bestritte mer z UniBern Turnier. Mir spile gägä zwöi 3. Liga Pro Teams u bechöme das o zgspüre. Mir merke, dass mer no chli Arbeit vor üüs hei bis d Saison aafangt. Üses Spiel ish no z unruhig, z unpräzis u es passiere vili Eigefähler. Doch d Vorfreund uuf d Saison wachst trotzdem, dr Ergiiz üs z verbessere ish gweckt u d Stimmig im Team ish super. Mir fröiie üs euch z zeige was mir chöi! Imos!