VBC Thun

Matchbricht Thun-Seftige vom 9. Februar

Im Verglich zu üsne andere Spiu si mir für einisch zimlech schnell ids Spiu cho. Mit guetem Ufbou u schöne Agriffe hei mir schnell e Vorsprung chönne usehole u dr 1.Satz mit 25:15 gwunne. Mir hei üs scho durf gfröit, de Match schnell zbeende, damitmr gli mau hei chöi..wi sech später usegsteut het, hättemr ds gschider nid gmacht!Nach dem dütleche Afang hei mir üs im 2. Satz wou aues chli zeifach vorgsteut! Dr Gägner het langsam ids Spiu gfunde u üs mit doch einige schöne Agriffe überrascht. Ihri Smashs u Service, womr irgendwie eifach ni hei füre ads Netz bracht, hei üs plötzlech unger Druck gsetzt umi hei üs ds Läbe selber schwer gmacht..So hei mir leidr de Satz mit 21:25 verlore.
Im 3. Satz hei mir wider chli ids Spiu zrugg gfunde. Oft hei mir üsi Agriffe aber ni wük schön chönne ufboue u es het teilwiis elend längi Bauwächsle gäh. Mir hei de doch es paar Pünktli me gmacht u so de Satz mit 25:22 gwunne.
Eigentlich heimer ja der 4. Satz eifach nur no wöue gwinne u fertig mache..aber o das isch widr mau anders cho. Mir hei dBäu eifach ni zBode bracht (odr emu i bi da dran fasch vrzwiiflet :) ), üsi Aspiu si widr mehrmaus im Netz glandet u ni zvergässe, dr Soutien, het leidr o völlig ni klappet. So hei mir o dä Satz am Schluss knapp mit 24:26 verlore.
Im 5.Satz isch so zimlech gar nüd me gange...Mehreri Aspiu si is Netz u o dAbnahme si irgendwo häre cho, aber sicher nid zum Passeur. So simer scho schnell 5:9 hinde dri gsi..Obwou mr no einisch hei ufghout u widr chli nöcher häre si cho, simr när es wiiters Mau a üsne Abnahme gschiteret u so isch dr Satz zimlech schnell mit 15.10 für Seftige zEnd gange..

Mir hei üs gloub mau wider selber gschlage..u drum giuts natürlech, das znechschte Mal besser zmache :)

Matchbericht vom 31. Januar 2012

Mir hei nis am Zischtig aabe ir Turnhaue vom Gymer Seefäud troffe. Mir sy sehr motiviert u teil ou rächt übermüetig id Haue cho u Mättu het nis scho vo Afang a gseit, das mer nis söue Müeh gäh, ou wemer gäge Tabäueletscht spile. I der Vorrundi heimer das scho mit guete Resultat gschafft.
Mir hei ygspieut u no ds Chrützspiu gmacht. Das isch ni so guet glüffe wie oscho.
Trotzdem heimer aui es guets Gfüeu gha nachem Yschla.
Der erscht Satz heimer guet gstartet u sy schnäu ids Spiu innecho, aber ou sehr schnäu het me gmerkt wie eifach das Spiu isch u mir hei nis uf ds Niveau vom Gägner abeglah. So heisis doch no uf viu Pünkt gschafft. Ufgrund vo üsne Eigefähler heimer de Satz nume 25 zu 15 gwunne. Auso heimer e Steigerug füre zwöit Satz wöue. Mir hei viu uspribiert. Mau es A oder es vieri, es paar Mau e Penelouf. Aber irgendwie hets immer i Eigefähler gändet. Derzue isch cho, das mer allei im zwöite Satz siebe Aspieufähler hei gmacht. Drum isch der Entscheid vom zwöte ou mega knapp usgfaue mit 25:22.
Im dritte Satz heimer nis nomau zämegno u hei annähernd zeigt, das mer chöi Volleyspile u hei mit guete Service, bis ufene spassige vom Andi, u guete Agriffe dr letscht Satz mit 25:12 schnäuer fertig gmacht. U so symer am haubi zähni aui ufem Heiwäg gsy.

Thun-Schwarzenburg vom 28.01.2012

I dr Vorrundi heimr leidr ni so viu Glück gha u hei 1:3. Verlore.Därum simr aui chli agspannt xi. Wüu d 3.liga pro no match het gha, heimr üs no einigi Minute müesse geduude.Mir si abr guet i 1.Satz gstartet, es isch zwar knapp worde abr mir hei 25:22 gwunne. Dr 2. satz heimr abr de mit 18:25 abgä.Dr 3. isch widr chli knepper worde, wobi mir am Schluss di schwechere Närve hei ka. 22:25 :(Mir hei gwüsst, dasmr jez nomau aues müesse gä u so heimr di ganzi Sach nomau kehrt u 25:19 gwunne. O dr 5.Satz heimr gwunne u das sogar zimlch klar. 15:6. I finge, das ds eine vo de beste u spannendste Match bis jez isch xi. Danke aune !
Andrina

Matchbericht Papiermühli vom 21.01.12 5. Liga

Dr Match gäge Papiermühli isch gloub eine vo dene Matche xi wome eifach muess striche und vergässä.
Während em ganze Match si mir eigentlech nie uf üsem Niveau xi ussert im zwöite Satz hets es paar Liechtblicke gä u drum isch dä Satz o a üs gange. Mir hei eifach nid so harmoniert wi mir das normalerwiis würde.
Drum hie churz und schmärzvou d Satzergäbnis vo däm (un)vergässleche Spiu gäg Papiermühli:
1.Satz 25:23; 2.Satz 27:25; 3. Satz 17:25 und dr 4. Satz 25:15
I gloub da gits nid viu meh derzue z’sägä ussert: Froue mir chöi das besser ;) !!!
Flo

Matchbericht VBC Thun – VBC Köniz B

Scho wo mir am haubi 8ti zur Haue si cho, isch für üs klar gsii, dass dä Match eher chli es ‘’usprobiere’’ und mau chli es ‘’meh wage aus schüsch’’ wird sii. Da mir ja Köniz scho ir Vorrundi locker hei gschlage, hei mr gwüsst, dass dä Match für üs nid grad dr närveufribenschd wird si.
Am haubi 9ni hei mir de dr 1. Satz gstartet. Aus Team hei mir grad mau 2 Mittispilerinne, 2 Usse u 3 Päss zämä bracht. Auso ischmä mau wider viu zum spile cho. Im 1. Satz heds aber doch de meh gharzet aus mr hei dänkt. D Wiehnachtsgüetzi u z lange nid trainiere si üs äuä no schwär ufem Mage gläge u mir hei dr Satz ‘‘nur‘‘ 25:18 gwunne. U was üs vor auem zum Verhängnis isch worde, si üsi Aspiu gsi. Scho 8 Pünkt hei mir ihne nur dür Servicefähler gschänkt.
Im 2. Satz si mir üs aui einig gsi, dass ds so nid cha witer ga. Schliesslech isch vo Köniz nid so viu zrügg cho, wie mir üs schüsch gwanet si. Üses Vorhabe isch de oh glunge u mir hei si 25:6 gschlage. (erwähnenswärt isch no, dass vo dene 6 Pünkt wo si hei gmacht, 4 Servicefähler vo üs si gsii.. ;))
Da mir aui iwie chli müed si gsii, hei mr beschlosse, dr 3. Satz oh für üs z entscheide. Das ischnis de mit 25:9 schlussändlech oh glunge. Am 10ni hei mir üse Siieg ir Täsche ka u si zfride, aber mitem Wüsse, dass mir doch nid z beschde Könne vo üs hei zeigt, hei gange.
Froue es isch e kuule Match gsii und villech dänke mir ja de i Zuekunft oh chli meh dra,
dases ja no e Penelouf würd gä J
Laura

Mätschbricht 5. Liga vom 15. Dez. 11

Mir hei nis am haubi achti ir schadou haue zum letschte Spiu vor Vorrundi troffe. Aune isch klar gsy, das mer wei churze Prozäss mache...schliesslech symer aui ni eso möge!
Doch scho im erschte Satz heimer gmerkt, ds es ni so eifach wird! Mir hei kämpft u immer wieder dr Rückstand ufghout. Schlussemänd heimer 25:23 gwunne.
Im zwöte Satz symer scho wieder hindedry gsy, hei ume ufghout, abr es het glych ni ganz glängt: 23:25 verlore.
Füre dritt Satz heimer ume dr Sieg aus Ziu gno, doch es isch gd gar ni glüffe. Mit zäh Punkt Rückstand heimer zum Ufhole agriffe. Schlussemänd hets glych nid ganz glängt, mit 19:25, abr mir hei gwüsst ds mer itz haut uf füf Sätz wei ga... Im Satz 4 heimer nomau vou ufträit u glych nume knapp mit 26:24 gwunne.
Dr füft Satz wird hert - d Ussespielerinne hei düregspiut, es paar sy chrank u anderi möge süsch nüm so, wius e asträngende Mätsch isch gsy, bis da häre.
Mir sy schlächt i letscht Satz gstartet, was sicher ni ar Understützig vom Publikum het gläge - syt super gsy!
Ou dä Satz isch ganz knapp verlore gange, mit 12:15, u so heimer nume mit eim Punkt id Wiehnachtsferie chönne.
Froue, es isch e super Vorrundi gsy u mir hei itz gnue Rächnige ds beglyche!!!
Carambool!!!!!
Giuli

5. Liga Damen VBC Seftigen - VBC Thun b

Resultat: 3: 1
25:23, 25:22, 24:26, 25:18

Mir si wie immer amenä usswärts Match mit üsem Bössli uf Gurzele gfahre um 3 Pünkt uf Thun tshole. Nachdäm de ts Spiu wo vor üs gsi ish ändlech feritg ish gsi het üse Match chönne starte.
Scho bim Iischlah hetmä gmerkt das Bäu vom Gägner retour chöme u mer nüs ufenes spannend spiu chöi fröie.
1 Satz:
Im erstäh Satz heimer gmerkt das ts Niveau vom Gänger höch ish u mer müesse suberii abnahme mache dases geit u jedi 100% muess gäh. Der ganz Satz ish eis hin u här gsi, Service fähler vo üs u vom Gägner u am Schluss hets ganz knapp nid wöue si, d Seftiger hei ganz weneli meh Närve bewisse.
2 Satz:
Mir hei gwüsst so der zwöit Satz ish üse, hei üs aber de starke Service vom Gägner immer wieder müesse gschlage gäh u hei wichtige u fiu pünkt nachenand verlore.
So ish leider o der zöwit Satz a Gägner gange.
3 Satz:
Im dritte Satz simer vo afang a guet dricho u hei am Afang wichtige Pünkt chöne für üs entscheide. Gäge schluss vom Satz simer mit emene guete pouschter vore gsih. Hei aber mühe gha mit de abnahme u so ishes am Schluss glich no mega knapp worde
4 Satz:
Im vierte Satz simer zersch 4:0 oder so öppis hinde gsi u Mättu het üs imende Timeout klar gmacht dasmer itz müesse u ke ziit meh hei zum "lauerä".
Mir hei im ganze Satz mühe gha üses Spiu dürets zieh u si immer rächt wit zrügg glägä. Am Schluss heimer no mau äuess gäh u no par Pünkt gmacht, aber glängt het nüme.

Fazit: Mir hei e guete Match gspiut, hei umd Bäu kämpft hei üs aber am Schluss müesse gschlage gäh. Aber Achtung Seftiger ir Rückrundi schlöhmer öich!

Mercii a auii vom Team, so fägts u znächscht mau Gwinnemer =)

Matchbricht: Melanie Wüthrich

Matchbericht VBC Thun - Seefeld Thun vom 19.11.2011

Am Samsti am 19.11.2011 am haubi sächsi si mir gäg z Team "Seefeld Thun" ahträttä. Nachem Ihspile u beguätachte vo üsne Gägner hei mir üs ufs Fäud begäh.Dr erst Satz hei mer mit bravur gmeisteret u mit 25:15 gwunne. Im zwöite Satz isches grad so guet witer gange, mir hei leider ei Punkt meh abgäh aus im erste ;) aber so hei mer o dä Satz mit 25:16 für üs entschide. U im Dritte u letschte Satz heimer no einisch richtig ufdräit u dr Mätsch schlussändlech mit 25:8 beändet.Leider wärdä mirs nid immer so liecht ha u üses Spiu so chönne düre zieh, aber mir werde witerhin vou Gas gäh!
Alle Froue :)

Matchbericht VBC THUN – VBC SCHWARZENBURG 1:3

Im erschte Satz simer sehr schnäu i üses Spiu inecho u heine drum ou zimmlech schnäu und dütlech für üs chönne entscheide =) Aui si mit ihrer Leischtig sehr zfride xsi, und ou Mättu hez gfalle. – 25:16
Im zwöite Satz isch’s üs leider nüm so guet gloffe. D Spilerin Nr.7 vo Schwarzeburg het fasch aues Blocket und o üsi löcher xsee. Ou mit rächt viu Eigefähler heimer de Satz mit 13:25 müesse abgä.
Im dritte Satz heimer am Ahfang rächt gschlaafe. U womer üs wider gfasst hei si si scho rächt nach bi 25 xsi. Obwohl mir no einisch ufdräiht u bis am Schluss kämpft hei, hez knapp nid glängt u o dä satz heimer mit 20:25 verlore.
Dr viert Satz heimer unbedingt wöue gwinne! Sehr warschindlech heimer fasch z viu wöue. D Abnahme si nümme cho und rächt viu Bäu si a d Decki oder ad Ringe ufe. O we d Halle so töif isch xsi.. Machbar wärs würklech xsi, das heimer ja im erschte Satz xse...
Aber mir luege füre, u UF dr Rückrundi packemer se ganz sicher! ;)
Joy

VBC Thun – Volleyball Papiermühle vom 03.11.11

Da dr Match so churz isch gsi (ei Stung), wird o dr Matchbericht nid lenger usfaue… Mir hei super gstartet, heinis nid vo dene grosse Gägnerinne la beidrucke, viu schöni service gha u vode Fähler vom Gägner chöne profitiere. (25:14)
Bim 2. Satz isches nid angers gsi. Si hei säute chönne schön Agriffe, da üsi Service sehr starch si cho, mir hingäge hei meischtens guet chönne ufboue u Agriffe. (25:13)
Im letzte Satz het o nüme viu gänderet. Mir si, egau i welere Ufstellig, stercher gsi, hei di schönere Pünkt gmacht u hei dank em grosse Vorsprung o meh chöne usprobiere. (25:12)
Für mi und d‘Janosha isches e super Start id Saison gsi J
Meli

Matchbericht vom 29.10.2011 Thun b – Köniz b

Er isch itroffe, dä Tag wo mir zwöi Matche nachenand hei. Dr erst z Köniz u dr zwöit z Thun. Klar, mir hei aui gwüsst, dases asträngend wird, aber mir si wie immer guter Dinge xi =) Motiviert s mir mitem Bössli richtig Köniz gfahre.
Z Chrüzspiu het üs vorem Match uf üse erreicht Sieg vorbereitet. Dr erst Satz isch wi gschmiert gloffe und rächt schnäu hei mir das wunderbare Mittiloch vo üsne Gägner chönne usnütze. Somit isch dr erst Satz mit 25:9 a üs gange

Im zwöite Satz isch widrmau üse bekannt Durchhänger ufträtte..villech sötte mir mau ga abklärä wiso dä widerkehrend isch ;) Mir hei nid das Volleybau gspiut, wo mir normalerwis spile und das het Köniz usgnützt, was ja jede Gägner hät gmacht . Aber mir hei üs widr chönne fa und si widr i üses Spiu zrüggcho. Dr Spiustand isch schlussändlech 25:22 xi.

U wo dr dritt Satz bevor isch gstande simr üs aui einig xi dä schnäu z tilge damit mir no chli ä lengeri Pouse hei bis dr Match z Thun am 7ni afat. Gesagt getan: Dr letscht Satz isch richtig a üs verbligflitzt (25:11) und mir hei üs mitemne fette 3:0 ufe Heiwäg gmacht.
Es isch e kuule Match xi Froue =)
Wir spielen immer fair, immer fair, und wir sagen „Danke sehr“ =)
Flo

VBC Thun - TV Steffisburg A vom 20.10.2011

Man nehme:

• 1 Raffaelo, öffne es , beisse in die knusprige Hülle ( -> 0:2 man hat am Spielbeginn etwas zu knabbern)
• dann lässt man sich die Creme auf der Zunge zergehen (-> 2:2 man verringert den Rückstand ohne grosse Anstrengung).
• Am Schluss beisst man sich an der Nuss die Zähne aus (-> 2:3 man verliert am Ende dennoch).

Danke Jasi & Jenny für die Hilfe beim Raffaelo-zerbeissen. :D
By: Debby, Laura, Päscu, Demi, Märu